La bona sera e buon principio d’anno
a tutte sti signure in compagnia!
Simmo venute e turnammo ògne anno
Per farve chillo aurio che sapimmo.
Spilateve li rrecchie, apritece lu core,
la casa, la dispensa e la cantina,
ca cheste so ghiurnate de cuntiente:
se magna e se beve e nun se penza a niente.
1
Aprimmo l'anno nuovo
co tric-trac e botte
passammo chesta notte
in allegria.
2
Nascette lu Messìa
avenne puveriello,
nu voje e n'aseniello
pe vrasera.
3
Da tanno a sta manera
passato s'è stu juorno,
pe ffà dispietto e scuorno
a Farfariello.
4
Ca chillo mariunciello
nce avea tutte aggranfate
nè ce avarrìa lassate
e nce arrosteva.
5
Si ntiempo nun veneva
da Cielo lu Guaglione,
ca p'essere sguazzone
nce priggijae.
6
E tutte da li guaie
vulette liberarce,
patenno e co lassarce
purzì lu piello.
7
Ma nuie che scurdarielle
nun simmo e manco ngrate,
passammo sti ghiumate
a fa' sciacquitto.
8
E lu sentire schitto
turnà lu zampognaro
nce mette 'allummacare
alleramente.
9
Nce fà venire a mente
la luminosa stella,
la bella grotticella
e li pasture.
10
Che gruosse e criature
dall'angelo avvisate
currevano priate
a la capanna.
11
E chi lle porta o manna
co ceste e co panare,
e chi lo va 'adurare
a faccia nterra.
12
E da luntana terra
pe ffino li tre magge
cu traine e carriagge
se partettero.
13
Ch' appena che vedettero
lu cielo alluminato,
dicettero era nato
lu Messìa
14
E con gran cortesia
vediste aggenucchione
de nanze a nu guaglione
tre regnante.
15
Arode, re birbante,
trasette già mpaura
ca chella criatura
lo spriorava.
16
E pecchè se tremmava,
chell' arma ntraverzata
fà fà' chella salata
de guagliune.
17
Che, simmele a picciune,
li ffacette scannare,
pe farece ncappare
a lu bammino.
18
Chiù nfame, chiù assassine,
n'avite visto maie?!
E nterra nun chiavaje
tanno per tanno.
19
Ma le restaie lu nganno
nè ne caccia niente
cu tutte li nuziente
ch' accedette.
20
Chè la Madonna avette
da Cielo lu cunziglio
de ne fuì' lu figlio
tanno, tanno.
21
Sti ccose già se sanno,
ma quanno è chistu juorno
nce affollano chiù attuorno
a la memoria.
22
E sia ditto pe gloria,
nce portano allegrezza,
tanto che nc' è priezza
p’ ogne parte.
23
E sulo all' addonare
ch'asciute so' li ppigne
te preje a chillu signe
de Natale.
24
Vi' mo p' ògne locale
pe ppuoste e pe puntune,
li rrobbe so' a muntune
apparicchiate.
25
A festa so' aparate
purzì fora li vie
poteche, speziàrie
e bancarelle.
26
E nne vide spurtelle,
panare, votte e ceste,
e scatole e caneste,
e gran spurtune!
27
D'anguille e capitune
e pisce d'ogne sciorte
ne vide grosse sporte
a centenare.
28
Tutta sta rrobba pare
putesse abbastà n'anno
e pure tanno, tanno
scomparisce.
29
La gente trase e esce,
e corre e va e véne,
e spenne quanto tene
pe la canna.
30
Nè truove chi nun manna
n'aurio o nu rialo:
sarrà malo Natalo
nun mannà niente.
31
Lu strazio de' nuziente
se fà cu li capune,
che songo a miliune
scapezzate.
32
Neh! vuie quanno truvate
chiù festa e chiù allegria?
ma la pezzenteria
nun canuscimmo.
33
E nuie perzò venimmo
co festa cante e suone
a purtà' lu buono
principio d'anno.
34
Priesto ca fenerranno
li guaie e li turmiente,
nè mmaie cchiù lamiente
sentarrate.
35
Spero che vedarrate
spuntà' pe vvuie na stella
lucente comm' a chella
e auriosa.
36
Spero ch' assaie sfarzosa
la sciorte addeventasse,
e che ve contentasse
a tutte quante.
37
Si si' niuziante
sempe puozz'aunnare
comm'aònna lu mare
ntutte ll' ore.
38
Si po' si' vennetore
e tiene magazzino
se pozza ògne carrino
fà' ducato.
39
Si po', si' n'avvucato,
te dico sulamente
che puozze avè' cliente
cape tuoste.
40
Pecchè l'abbusco vuosto
nce sta ogne manera:
o perde, o va ngalera,
o fà denare!
41
Puozze, si si' nutare,
fà' poche testamiente,
capitule e strumiente
nzine fine.
42
Si' nu ngegnere fine?
Truvasse ricche pazze
per fravecà' palazze
e turriune.
43
O meglio a la commune
aggranfete culI'ògne,
ca llà sempe se mogne
e se va nchino.
44
Si' n'ommo traffechino
e vuo' cagnare stato?
rijesce deputato
o conzigliere.
45
Tanno si' cavaliere?
Si lu guverno appruove
ll' anema de li chiuove
venarranno.
46
Si prevete? Te manno
ll' aurio ca dimane
si' fatto parrucchiano
o monsignore.
47
Si si' faticatore,
salute, forza e accunte!
Accossì tu la spunte
e può campare.
48
Però aje da scanzare
lu juoco e la cantina
o ncuorpo la matina
niente trase.
49
Si si' patrone 'e case
te scanza lu Signore
de male pavature
comm a nnuie.
50
Che ntiempo se ne fuie
li tterze si nun pava
e se porta la chiava
d'altrittante.
51
Si po' si navigante
nn’ avisse maie tempeste
fà' li viagge leste
e ricche ancora.
52
Si' miedeco? Bonora
me', mbruoglie nveretate!
Va', puozze ògne malate
fà' guarire.
53
Sti bobbe, pozzo dire,
Si si' nu speziale
sanasse ògne male
ògne dulore.
54
Si po' si' ghiucatore,
venga la carta mpoppa
nè puozze maie fà' toppa
a zecchinetto.
55
Si essere prutetto
da la fortuna vuoje
cerca 'e fà' quanto puoje
d'essere ciuccio.
56
Si' quacche mpiegatuccio?
Puozze piglià' nu terno
si no starraje n'eterno
ndebetato!
57
Nzomma, nqualunque stato
avisse li rrecchizze
e chelle contentizze
c'addesirie.
58
E chi ne tene mmiria
che pozza fà' na botta
o lle scennesse sotta
nu contrappiso.
59
Troppo nce avite ntiso,
e ve site stufate
e nuie simmo stracquate
e sete avimmo.
60
Daccà nun ce munimmo
la faccia è troppa tosta,
simmo venute apposta
e ll' aspettammo.
61
Neh! Ch'addesiderammo?
Castagne, fiche e nuce,
e autre cose duce,
e susamielIe.
62
Duie o tre canestrielle
abbastano a sta panza:
sapimmo la crianza
e simmo poche.
63
Primma de chessa lloche
nce aprite la dispenza:
simmo de confidenza
pigliammo tutto!
64
o provole, o presutto,
n'arrusto nu castrato
o friddo o sia scarfato
nu capone.
65
Nuie, l'obbricazione
sapimmo esattamente,
né ce restammo niente
pe farve annore.
66
Ca site nu signore
sfarzuso e corazzone,
e ntutte l'occasione
nun scumpante.
67
Piacere anze n'avite,
si v' immo scommorato,
e nce addesiderate
l'anno che vene.
68
Tanno trovà' cchiù bene
sperammo e cchiù allegria
e na speziarìa
'e cose doce.
69
Nce resta anze la voce
pe ve cercà' licenza
dann' a sta bona udienza
la bona notte.
70
E bona notte,
Buon capodanno a tutte,
e bona notte!